آخر 10 مشاركات
وَاتَّقُوا يَوْمًا تُرْجَعُونَ فِيهِ إِلَى اللَّهِ ....تصميم           »          اختصارات لوحة المفاتيح على تويتر           »          قارونُ قبلَكَ           »          الجامد والمتصرف           »          طلاق أمامة           »          تواضع العلماء           »          الالية الجديدة للامتحان الشامل لطلبة الدكتوراه           »          إذا استغنى الناس بالدنيا فاستغن أنت بالله           »          مطوية (مَنْ يُطِعِ الرَّسُولَ فَقَدْ أَطَاعَ اللَّهَ)           »          فضل الإكثار من صيام النوافل


منتديات أهل السنة في العراق

منتدى اخبار العراق السياسية والامنية اخبار العراق اليوم , الاخبار السياسية والامنية العراقية



إضافة رد
 
أدوات الموضوع انواع عرض الموضوع
قديم 2013-06-02, 06:56 PM   المشاركة رقم: 1
المعلومات
الكاتب:
عبد الله الدليمي
اللقب:
كاتب و شاعر القادسية
الرتبة:

البيانات
التسجيل: Feb 2013
العضوية: 48
المشاركات: 156 [+]
معدل التقييم: 63
نقاط التقييم: 254
عبد الله الدليمي is a jewel in the roughعبد الله الدليمي is a jewel in the roughعبد الله الدليمي is a jewel in the rough

الإتصالات
الحالة:
عبد الله الدليمي غير متواجد حالياً
وسائل الإتصال:

المنتدى : منتدى اخبار العراق السياسية والامنية
Berigh10 د. طه الدليمي يسوي مشاكل.. وآني ابتلي!

د. طه الدليمي يسوي مشاكل.. وآني ابتلي!



د. طه الدليمي يسوي مشاكل.. وآني ابتلي!


عبد الله الدليمي – خاص بالقادسية

أدري بوضعنا مأساوي ومو مال ضحك.. بس والله يا جماعة.. ومالكم علي يمين ولا يسار.. اول البارحة ضحكت من اعماق معاميق گلبي – واعصبوها براسي.. ومثل ما يگول المثل التنزاني: شر البلية ما يضحك.
صديق دزلي مقال للشيخ عبد الحكيم السعدي منشور على موقع البصرة نت:
http://www.albasrah.net/ar_articles_...3di_280513.htm
طبعا هذا الموقع بعثي للعظم وما ينشر موضوع يخالف توجهاتهم (يعني عاد الفرع للأصل.. والما يعجبه يثرم بصل).
يگول الشيخ – يا محفوظين السلامة:
"... قرأت على موقع ما يسمى " القادسية " موضوعاً بعنوان (( يا شيخ عبد الملك السعدي ! دع الأمر لإهله)). ورمز لكاتبه بــ " عبد الله الدليمي " ولا شك انه اسم مستعار والكاتب معروف لدينا لانه سبق ان استخدم هذه العبارة ضد الشيخ في برنامج تلفزيوني وكتب ذلك على موقعه ."
رابط المقال المقصود:
http://www.sunnti.com/vb/showthread.php?t=5442
طبعا الشيخ عبد الحكيم يقصد الدكتور طه الدليمي (لأن هو كاتب المقالة.. ولا شك!!).. وبما إني حباب وطيب وأحب فعل الخير، فراح البس البشت والشفقة والنظارة، واصير خـبّاب طير.. قصدي طباب خير.. بين الطرفين.
وبحكم كوني ابن عم الدكتور طه واموت عليه.. قصدي امون عليه.. فراح اميل عليه واعاتبه بشدة.. بل وادين واستنكر واشجب هذا التصرف اللي بدر منه واگول له: ميصير تكتب هذا الكلام على مراجعنا (العظام!)... بعدين ليش تنتحل شخصية غيرك يا أخي؟ شنو (هربان من البوليس)؟ .. لو اسم واحد ما يكفيك؟
بعدين أكو واحد يترك اسم بيه (شين ودال ونقطة) وينتحل اسم مال واحد حافي منتف؟!
لكن بالمقابل (فيصل القاسم): شنو اللي يجبر الدكتور طه يستعير اسم آخر وهو يمتلك كل هاي الجرأة بالطرح وما يخاف في الله لومة لائم (نائم)؟ أشو الرجال معروف ويتبنى مشروع معلن.. ودا يطلع بالصورة والصوت ويعبر عن آراءه بكل وضوح وصراحة بحلقات البرنامج وعلى موقع (ما يسمى بالقادسية)، ومو خايف حتى مني شخصيا (على جلالة قدري.... قاد بقرنا)!
لذلك آني شما أشوف الدكتور طه مظلوم.. لأن هذا الاسم (عبد الله الدليمي) مار علي هواية بموقع القادسية وغيره من المواقع، ويكتب بأكثر من منتدى. وعلى ما أعتقد عنده موقع خاص بيه ع الفيسبوك والتويتر، وينشر ويغرد على راحته.. وما خلا سعفة نخل او غصن قلنطوزة وما غرد عليها.. وحتى مرات يـ (....) وهو يغرد.. يعني معقولة يكون هو نفسه الدكتور طه بس يكتب باسم ثاني (بعدما يفصخ الشين والدال والنقطة)؟
يمكن.. ليش لا.. هذا دليمي ويسويها.. وما أحلف على واحد يمشي على رجليه.
زين هوب هوب (تُمَس).. ومداخلات (عبد الله الدليمي) بحلقات الدكتور (طه الدليمي) وقصايده اللي مرات يطعمها بهوسات وچوبي.. وبس عوزه يعلگها طبل ومطبگ وهلاهل ويرميله شاجورين مذنب؟ هاي شلون بيها؟
لالا.. مبينة الشغلة.. اكيد عبد الله الدليمي شخص آخر غير طه الدليمي.. يعني قابل الدكتور طه بالحلقة وهو على الهوى يستأذن من نفسه ويطلع خارج الاستوديو حتى يتصل بنفسه ويگللها: " تحية لشيخنا الحبيب الدكتور طه الدليمي".. وبعد ما يكمل القصيدة يگول لنفسه: "احسنت يا ابن العم"؟ هسه لو گايل: "احسنت يا آني" چان كشفناه.. بس ما فد يوم گالها. هذا دليل حارق خارق على ان عبد الله الدليمي غير طه الدليمي.. هذا آخر كلام... وأثبّت (والعنده يصيح باااات).
زين لعد منو هذا عبد الله الدليمي اللي علگها بين الشيخين وشطح ولا چنه مسوي شي؟
يلله وين يروح؟ مصيره ينكشف.. قابل يريد يطير؟
رد الشيخ عبد الحكيم تحت المجهر
عاد هسه بعد ما عاتبت ابن عمي واستنكرت سوايته (اللي ما يلبس عليها قبوط)، ارجع للرد مال الدكتور عبد الحكيم السعدي. وراح افصخه كشمة كشمة حتى اسويله تحليل وسونار، واليجي من رب العالمين خير ونعمة:
يگول الشيخ:
"وأنا أربأ بنفسي بالردّ على هذا الموتور المأجور الذي ملأ الدنيا صراخاً وتباكياً على أهل السنة بينما هو يحوك المؤمرات ضدهم بطرق نحن نعرفها ويعرفها المطلعون على دقائق الأمور.."
هنا عندي چم وگفة (يعني ملاحظة مو وگفة مال غنم):
أولا: عبارة (أربأ بنفسي بالردّ) حيل رچيچة. لأن كلمة (أربأ) معناها: أنزّه.. أو أُبعد.. أو أنأى بـ.. ولازم تاخذ حرف الجر (عن) مو (بـ). بس يلله.. يمكن الـ (عن) چانت مريضة لو عدها خطار ودزت الـ (باء) بمكانها.. كل شي يصير!!
يعني آني دليمي وعلى گد حالي ودا اكتب بالجلفي، وما استشاغـ... ما اشتساغـ... ما اشتشـاغـ .... ايهووووووو (ما قبلتها يعني)، لعد شلون لو يقراها سيبويه؟ يمكن چان شگ هدومة وطلع..... بالتلفزيون.
ثانيا: الدكتور طه موتور ومأجور.. مو؟ مأجور لمن؟ لإيران اللي تتمنى تشرب من دمه؟ لو لأمريكا اللي يهدد مشروعها اللي يريد يخلق اقلية شيعية قوية على حساب اكثرية سنية ضعيفة؟
هو لو مأجور چان من زمان عنده قناة فضائية (مثل غيره).. مو صار له سنين يحاول يفتح قناة وما يگدر!
بس هو فعلا مثل ما تفضلت: موتور.... (يولد أفكار وغيرة عالية الفولتية) ومأجور.. (من ربه).. ومشكور (من أمته اللي شايل همها ويتكلم باسمها). يعني مو أحسن ما يكون موتور (ابو الدوبة) يركب عليه عدونا - مثل بعض الناس؟
ثالثا: اذا الدكتور طه (ملأ الدنيا صراخا وتباكيا على أهل السنة) فهذا شرف له يستحق ان يفتخر بيه بالدنيا والآخرة، لأن الصراخ على قدر الألم .. واللي ما يتألم على حال اهل السنة ويصرخ بعلو صوته خلي يراجع طبيب جلدية حتى يفحصله الخلايا الحسية، وطبيب اذن وأنف وحنجرة حتى يفحصله الحبال الصوتية.. ولو اكو طبيب مال غيرة جان نصحته يروحله.. بس مع الأسف ماكو. يعني خصم الحچي: هاي النقطة للدكتور طه ضدك.
رابعا: انت تتهم الدكتور طه بأنه يحوك مؤامرات ضد اهل السنة.. زين، شنو دليلك.. (ألولو)؟
خامسا: تگول انك مطلع على (مؤامرات) الشيخ طه الدليمي ضد أهل السنة، وآني راح افترض كلامك صحيح.. زين ليش ساكت عليها؟ مو من واجبك الشرعي والأخلاقي (والوطني) انك تنبه العراقيين وتحذرهم من خطورتها... بعد ما تثبتها بالدليل؟
سادسا: كاتب المقال ما نقل تفاصيل الاتصال الهاتفي الا بعد ما تأكد من طرف ثالث غير سعيد اللافي وعدنان مشعل، ومع ذلك اتهمته بالافتراء والتلفيق، في حين انت سمحت لنفسك تتهم الدكتور طه باتهامات اشنع وبدون دليل.. هذا مو تناقض صارخ يا فضيلة (وريث الأنبياء)؟
ويگول عن د. طه:
"كما انه ليس من أهل الإختصاص في علوم الشريعة بل أقحم نفسه فيها حتى أصبح يدعى - بالشيخ كذا - بينما هو جاهل بأصول الشريعة ومقاصدها وتخصصه بعيد كل البعد عن علومها ."
هاي هم نقطة ضدك حجّي.. ولو آني بمكانك والله ما اجيب طاريها؛ يعني اذا هو مو متخصص بعلوم الشريعة وفاهمها احسن منكم ويفتي للناس بالنوازل ويتناول بطروحاته مختلف فروع الشريعة لخدمة الناس.. لعد شلون لو متخصص؟
الرجال طبيب، بس غيرته على دينه وأهله خلته يترك الطب ويتجه للدعوة والتحذير من خطر إيران والتشيع، في وقت تخليت انت عن هذا الواجب وچنت تمشي بصف الحايط البعثي على حساب هواية أمور. هو ترك طب الأبدان واتجه لطب العقول والأرواح، وهذا تخصص نادر محد يشاركه بيه.. يعني ماركة مسجلة باسمه. ولو انت وغيرك من المعممين قايمين بهذا الواجب چان يمكن ما كلف نفسه هذا العناء.
بعدين حتى لو چان فهم الشيخ طه للشريعة أقل منك، العبرة بكمية المعلومات الشرعية لو بدقة تنزيلها على الواقع بطريقة تنفع الناس؟ بعدين منو گال الدين طابو باسم المعممين؟ ومنو گال الفقه مجرد حفظ معلومات بمجالات فرعيات جامدة؟
وينكم عن كليات الدين والضرورات الشرعية؟ لو عبالك الشغلة بس كشخة بعمامة ودال ونقطة؟
واذا الدكتور طه يحوك مؤامرات وجاهل بأصول الشريعة ومقاصدها، ليش ما تحشد اخوتك ورفاق دربك بالهيئة وتناظرونه حتى تبينون للناس (جهله وخطورته ومؤامراته)؟ الرجال انبح صوته وهو يدعوكم للمناظرة والحوار.. روحوا ناظروه.. ناقشوه... افحموه.. (خللوووه).. حتى يتبين للناس منو الجاهل بمقاصد الشريعة واللغة والأدب والمنطق والتاريخ والجغرافية والرسم والرياضة والنشيد والحياتية.
ويگول:
"ولست أجدني مضطراً الى تناول ما ورد في المقال من افتراءات وكذب وإدعاءات على رمز من رموز الشريعة ومرجع من مراجعها وقائد من قواد مسيرة الخلاص الوطني فيها.."
هنا هم عندي چم وگفة:
أولا: انت يا شيخ عبد الحكيم فعلا مو مضطر تتناول ما ورد في المقال.. تدري ليش؟ لأنه راح يحرجك انت واخوك.. ولو انت متيقن في قرارة نفسك انه مو صحيح چان اثبتت العكس بمجرد اتصال هاتفي بالشيخ عبد الملك وبيان منه يكذب الموضوع (وهذا الميدان يا حميدان).
ثانيا: اللي ورد بالمقال ما نقله الكاتب وعلق عليه الا بعد ما تثبت منه، وانذكر بيه اسم معروف من قادة الاعتصام (الشيخ عدنان مشعل) اللي بنفسه اتصل بأخوك وانصدم. هذا الكاتب مو لهالدرجة ساذج حتى يجازف ويذكر اسم هذا الشخص اللي ممكن يكذب التفاصيل ويفضحه، لو هي مو صحيحة.
وحتى ازيدك من الشعر بيت (ملك مو إيجار)، البارحة آني حصّلت رقم الشيخ عدنان مشعل وخابرته (كطباب خير يعني) وسألته عن الموضوع وأكده بكل تفاصيله.. بعد شتريد؟ وانت واخوك (المقارع) تعرفون عدنان مشعل، وتكدرون تتأكدون منه.. حتى هم تفضحون (افتراء الدكتور طه الدليمي) (أما آني فما لي شغلة... آني مجرد ادير الحوار.. لا أكثر ولا أقل).
بعدين انت تنكر (بكسر الكاف) تفاصيل المكالمة الهاتفية بين الشيخ عبد الملك والشيخ سعيد اللافي وتگول هذا مجرد افتراء وكذب.. معنى كلامك هذا انك تنزه اخوك عن مثل هاي الحلول اللي طرحها على اللافي، وتنكرها لأنها غير معلنة.. زين، وخطابه العلني بساحة العزة والكرامة ببداية الاعتصام؟ مو طرح حلول وتوجيهات ادهى وامر من هاي اللي تنكرها بتسعين ألف مرة؟ لو هاي هم تلفيق؟ يعني قابل مثل هاي التوجيهات (الحكيمة جدا) جديدة عليه؟
يا عمي دخلينا ساكتين رحمة لجدك اللي مات وما ضاگ الشاورمة.
ثالثا: منو هذا بالله (الرمز والمرجع وقائد مسيرة الخلاص الوطني)؟ تقصد الشيخ عبد الملك؟ يمعود على بختك.. بس ناقصك تگول: وباني ملوية سامراء وبرج البعلوان.. وفاتح الأندلس وطويريج.. وقاهر التتر والجغايفة.
عمي ما ننكر الرجال متخصص بفروع محددة من الشريعة، حاله حال أي طالب علم بالسعودية وغيرها، بس غير من شدة الجهل بمجتمعنا وقلة المنافسين صار بعين الناس (فريد عصره وأوانه)؟
الرجال بارز بالفتوى بمواضيع تخص المواريث والنكاح والبيوع والدماء (مو دماء اهل السنة.. اقصد دماء اخرى).. وهاي الأمور لو جدتي (ميمي) عايشة هم چان عرفتها (رغم انها مالها علاقة بيها).. بفضل الشيخ العلامة Google وبرامج تقسيم المواريث والزكاة اللي يگدر حتى البنچرچي وابو عربانة اللبلبي يعرفها من خلال الموبايل او اللابتوب او الفضائيات.
اللي نريده بهاي المحنة هو فتاوي وطروحات بأمور السياسية الشرعية وفقه النوازل.. ما ادري انتوا سامعين بهاي المصطلحات؟ لو بس كاشخين بعمايمكم مثل خنجر اخو گشرة؟ (اللي ما يعرف قصة هذا المثل يخبرني بخانة التعليقات)
ويگول عن شيخ عبد الملك: "...الذي عرفه القاصي والداني بعلمه وحكمته وجهاده ومقارعته للأمريكان و الصفويين.."
من ناحية علمه، فالرجل – مثل ما گلت لك - عنده علم في مجالات محددة فرعية جامدة.. ويا ريت يظل بهذا المجال وما يتجاوزه.. اذا مو رأفة بحال الأمة.. فلمصلحته هو.
أما عن حكمته، فما ادري وين الدليل عليها.. بس آني خايف لا يكون عندك تعريف للحكمة غير اللي نعرفه احنا؟ وعلى گولة عجايزنا: (هاي بسطة شليلي) اذا شفنا منه شي بيه ريحة حكمة.
أما عن مقارعته للأمريكان.. فبهاي لك حگ.. الرجل ما خلا امريكي وما قارعه، بس شلون مقارعة؟ من عمان، عن بعد، وبشكل مخفي.. حتى يظل (يقارع) بدون محد يكشف مكانه.. (الحرب قرعة.. قصدي: خدعة).
آني اگول ليش الجنود الامريكان اكثرهم (قرعان)؟؟؟!! اثاري الشيخ صار له عشر سنين متوليهم (القرع)! أيييييييييييييه.. صدگ لو گال الشاعر البلجيكي:
القرع لما استوى... آل للخيار يا لوبيا.
وأما مقارعته للصفويين، فاسكت وخليها.. سوى طشارهم لبو عسلة.. والدليل شوفهم شلون مطشرين.. قسم بالعراق، وقسم بسوريا، وقسم باليمن، وقسم بالبحرين (هم يقارعون.. لأن اكتسبوا العدوى من الشيخ)... واتسعت دائرة (طشارهم) الى ان وصلت مصر وتونس ونيجيريا وماليزيا وجزر القمر.
وياريت تگول لاخوك المقارع: (طباب الخير) يسلم عليك ويگول علواه يظل (يقارع) بيهم... بلكي يوصلهم لزحل حتى نخلص منهم ومن شرهم.
عمي الله وكيلك الشيخ ما (قارع) غير اهل السنة اللي كل ما يصحون ينومهم، وكل ما يتقدمون خطوة يرجّعهم عشرة خطوات. وصدق الشاعر الفنزويلي حين قال:
على دلعونـة وعلى دلعونــة.... اهـل العمـايـم راح يدمـرونـا
كل ما نتقـدم خطـوة ليگــدام.... عشر خطاوي ورا يرجعونا

ويگول (اقصد الشيخ عبد الحكيم، مو الشاعر الفنزويلي):
"... لان تناول هذه الأكاذيب والإفتراءات مضيعة للوقت الذي نحن بأمس الحاجة الى اغتنام أية دقيقة فيه لخدمة قضيتنا في طرد الإحتلاليين الأمريكي والصفوي..."
ايبااااااااااااااااااااخ .. على اساس انتو شرمتوها... اشو انتو من صارت الطگة شلعتوا.. وطول العشر سنين ما سمعنالكم حس غير بخطابات وفتاوى كلها تخذيل وتخدير وتمييع.
الاحتلال الأمريكي طلع صار له اكثر من سنة ونص، وبقى الاحتلال الصفوي.. شلون راح تطردونه؟ بفتاويكم وتوجيهاتكم اللي تضعضع الصف السني وتخدم التشيع؟
اكبر مشروع يخدم السنة ويضر ايران والتشيع هو الفدرالية اللي حرمتوها على المساكين اللي يدورون على أي منفذ يخلصهم من مذابح الشيعة. واذا تريدون فعلا تساعدون السنة في طرد الاحتلال الصفوي.. بس اكرمونا بسكوتكم.. فقط لا غير.
ويگول:
"ان الذي أودّ التأكيد عليه في هذه الكلمات العجلى (حلوة هاي عجلى) ان موقف فضيلته كان وما زال وسيبقى هو الموقف الوطني الذي يجمع ولا يفرق ويحتكم الى العقل لا الى التهور.."
مو هي المصيبة ان (موقف فضيلته كان وما زال وسيبقى هو الموقف الوطني).. ليش هو شنو اللي ذبحنا وهجم بيوتنا غير الموقف الوطني (الذي يجمع ولا يفرق)؟ هو احنا لو عدنا معمم (يفرق) بين الدين السني والدين الشيعي وما (يجمع) بين اللي يحب الصحابة واللي يسب الصحابة.. چان صار بينا اللي صار؟
بعدين هذا يا عقل يابه اللي يحتكم اله؟ وعلى أي شي يستند؟ على مؤلفات ميشيل عفلق؟ زين وكلام رب العالمين والنبي صلى الله عليه وسلم؟ وكلام شيوخ الإسلام ابن تيمية والشافعي وابو حنيفة واحمد بن حنبل وغيرهم - اللي اجمعوا على تكفير الروافض؟ شنو كلام عفلق عدكم ناسخ لكل هاي الاقوال؟
ويگول:
"..أن قضيته الأولى والأخيرة هي وحدة العراق من أقصاه الى أقصاه تحت مظلة الحكم الرشيد في دستور عادل وحكومة عادلة بعيدين عن الطائفية و العرقية و المذهبية و الحزبية الضيقة..."
خوش حلم.. وردي ومقلم باخضر! وشلون بالله يتحقق هذا الحلم؟ بشعارات (اخوان سنة وشيعة)؟ لو بالردح والمدابچ مال قناة الرافدين؟
آني بس اريد اعرف: هاي عبارة "من أقصاه إلى أقصاه" شنو عدكم حالة وراثية بالعائلة؟ بعدين انتوا ما تشوفون اقصى العراق الشمالي صار دولة كردية، واقصاه الجنوبي بيد الشيعة (إيران)؟ مو كافي مچلبين بهالاسطوانة اللي هرت وهريتونا بيها؟
وما دام العراق موحد والشيعة اخوانكم والارض هيچ عزيزة عليكم.. ليش مهجولين انت واخوانك كل واحد جوى نجمة؟ ما ترجعون للعراق حتى تشبعون أخوة ووحدة ووطنية (ومولد)؟ حتى هم بدربكم تقارعون الاحتلال الصفوي (والا الامريكي "قرّعتوه" بره وخلصنا منه).
ويگول:
".. وانه سيبقى يجاهد لتحقيق ذلك مهما انفتحت عليه أبواق الحقد والكراهية التي يمثلها من يريد تمزيق العراق وتفتيته واضعافه حتى يسلموه لقمة سائغة للفرس.."
عمي ياريت تگول له شوية يخفف من جهاده.. اخاف يحرر كل البلدان المستعمرة بسرعة وتنحرم الأجيال القادمة من لذة النصر.. يعني خليه مثلا هالعشر سنين يحرر العراق، والعشر سنين الجاية يحرر فلسطين، ووراها الأحواز، ووراها جزر الواق واق، وجلم هرا.... هلم جرا.
وليش العراق هسه مو ضعيف ولقمة سائغة للفرس- لو مثل سويسرا؟
يا شيخ عبد الحكيم: والله اذا بقى الحجّي الچبير (يجاهد) بطريقته هاي لا يتقسم العراق بعد سيول من الدماء.. والا يجي يوم تتمنون بيه الإقليم اللي حرمتوه وما تلگونة.. واذا الله خلانا طيبين نتواجه واذكرك (حتى هم تشوفني وتتأكد آني طه الدليمي لو غيره؟).
ويگول:
".. ثم واصل الأبناء والأحفاد هذا الجهاد – كما ترون في ساحات الإعتصام – حتى يتم لهذا البلد الأبي نصره وتعود اليه لحمته بجميع أطيافه ومذاهبه.."
ساحات الاعتصام فعلا ساحات جهاد.. وممكن تكون منطلق لتحقيق اهدافنا.. بس هذا يتطلب مشروع اسلامي (بعقيدة صافية، مو تخبط مي ودهن!!) وراية وقيادة ورؤية وآليات وجماهير واعية.. مو توجيهات متخبطة وفتاوي الها راس بدون.......... (رجلين).
بعدين شذبحتونا بهاي (اللحمة) المعفنة اللي صارلكم سنين تكرون بيها عالنار وما تقبل تستوي؟ زين ليش ما تجربون (الشحمة) هالمرة.. يمكن تستوى اسرع.
وأخيرا يگول:
"...وحينئذ فليندحر هؤلاء المتخرصون الذين سخروا أقلامهم للنيل ممن هم سادتهم وتاج رؤسهم (هكذا) بدلاً من أن يسخروها لفضح اعداء الأمة وطغاتها والمفسدين فيها، وما ذاك الاّ لإغراض (يقصد: لأغراض!!) دنيئة ومكاسب دنيوية مشبوهة عافانا الله منها والله أكبر ولله العزة و لرسوله وللمؤمنين.."
أولا: ذولة ممكن يكونون سادة وتاج بالنسبة إلك واللي يتبعهم من (الطيبين).. أما تفرضهم على غيرك بالگوة فهاي (مو مئبولة منك بنوووووب.. ولووو!).
احنا سيدنا وتاج راسنا النبي صلى الله عليه وسلم اللي ما داهن اهل الباطل على حساب الدين، ثم شيوخ الاسلام الحقيقيين مثل ابن تيمية واحمد ابن حنبل والعز بن عبد السلام اللي فهموا الدين بأصوله وفروعه وطبقوا فقه السياسة الشرعية وجاهدوا بعلمهم وحذروا الأمة من خطر الروافض قبل الأعداء الخارجيين – مو اللي يگول: السني شيعي والشيعي سني، ويتلوگ للجلاد ويرزل بالضحية.
ثانيا: حسب علمي المتواضع، جمع رأس (رؤوس) مو (رؤس).. بس يلله، يمكن التاج چان شوية ضيگ فطيّر (واو) الراس.. عادي، تحصل بأحسن الروس.... والألمان!
مع العلم آني تغاضيت عن هواية شغلات، مثل ضعف اختيار المفردات وعدم ترابط الجمل وترتيب الأفكار والاستخفاف بالهمزات وعلامات التنقيط.. الخ. ولو آني معلم مال انشاء ويجيني هيچ موضوع للتصحيح چان خليت اللي كتبه يعيد كتابته سبع مرات.
بالله عليك لو مسوي مثلي وكاتب مقالك بالجلفي، مو احسن لك من هالمرمطة؟
(طبعا ممكن واحد يگول هاي الأخطاء اللغوية مال الشيخ بسبب العجلة وعدم المراجعة، لكن اللي يقرا فتواه المحرمة للفدرالية راح يغير رأيه. وبالمناسبة، عبد الله الدليمي (ابو الطلايب) هم رد على هاي الفتوى وفصخها لغة ومضمونا- على هذا الرابط:

ثالثا: گلي حجّي يرحم ابوك: هو منو الأقرب للـ ("إغراض" الدنيئة والمكاسب الدنيوية المشبوهة): اللي يدعو لإنقاذ اهل السنة وهويتهم وأعراضهم، ورفع راية التوحيد، لو اللي يقدس حدود سايكس – بيكو ويدعو للوحدة مع أعداء الله ورسوله وكتابه؟
عمي اتقوا الله وكافي تضحكون على انفسكم وتخدعون بالناس، والا والله باچر لا نوگفكم گدام رب العالمين ونطلع منكم (القضى والمضى)... على گولة جدتي (ميمي).

1-6-2013




المصدر : منتديات اهل السنة في العراق - من : منتدى اخبار العراق السياسية والامنية












التعديل الأخير تم بواسطة الحياة أمل ; 2013-06-03 الساعة 04:30 AM
عرض البوم صور عبد الله الدليمي   رد مع اقتباس
قديم 2013-06-02, 08:15 PM   المشاركة رقم: 2
المعلومات
الكاتب:
العراقي
اللقب:
المدير العـآم
الرتبة:

البيانات
التسجيل: Dec 2012
العضوية: 3
المشاركات: 9,247 [+]
الجنس :  ذكر
معدل التقييم: 200
نقاط التقييم: 2737
العراقي has a reputation beyond reputeالعراقي has a reputation beyond reputeالعراقي has a reputation beyond reputeالعراقي has a reputation beyond reputeالعراقي has a reputation beyond reputeالعراقي has a reputation beyond reputeالعراقي has a reputation beyond reputeالعراقي has a reputation beyond reputeالعراقي has a reputation beyond reputeالعراقي has a reputation beyond reputeالعراقي has a reputation beyond repute

الإتصالات
الحالة:
العراقي غير متواجد حالياً
وسائل الإتصال:

كاتب الموضوع : عبد الله الدليمي المنتدى : منتدى اخبار العراق السياسية والامنية
افتراضي رد: د. طه الدليمي يسوي مشاكل.. وآني ابتلي!

يالله اخوي عبدالله ميخالف لازم تتحمل شيخ طه
الدليمي شعاره اني واخويه على ابن عمي ... واني وابن عمي على الغريب هههه

يا اخي الامر حتى الجاهل يعرفه
لكن ما ادري ليش هذا التساهل او التجاهل من شيوخنا من آل السعدي الله يهديهم ويحفظهم












عرض البوم صور العراقي   رد مع اقتباس
قديم 2013-06-03, 04:32 AM   المشاركة رقم: 3
المعلومات
الكاتب:
الحياة أمل
اللقب:
مديرة عـآمة
الرتبة:

البيانات
التسجيل: Dec 2012
العضوية: 4
المشاركات: 28,899 [+]
الجنس :  اُنثى
معدل التقييم: 200
نقاط التقييم: 2633
الحياة أمل has a reputation beyond reputeالحياة أمل has a reputation beyond reputeالحياة أمل has a reputation beyond reputeالحياة أمل has a reputation beyond reputeالحياة أمل has a reputation beyond reputeالحياة أمل has a reputation beyond reputeالحياة أمل has a reputation beyond reputeالحياة أمل has a reputation beyond reputeالحياة أمل has a reputation beyond reputeالحياة أمل has a reputation beyond reputeالحياة أمل has a reputation beyond repute

الإتصالات
الحالة:
الحياة أمل متواجد حالياً
وسائل الإتصال:

كاتب الموضوع : عبد الله الدليمي المنتدى : منتدى اخبار العراق السياسية والامنية
افتراضي رد: د. طه الدليمي يسوي مشاكل.. وآني ابتلي!



[...
نسأل الله أن يرُدهم إليه ردآ جميلآ
بآرك الرحمن فيكم
ونفع بكم
::/












عرض البوم صور الحياة أمل   رد مع اقتباس
قديم 2013-06-05, 05:18 PM   المشاركة رقم: 4
المعلومات
الكاتب:
بنت الحواء
اللقب:
:: مدآفع عن أهل السنة ::
الرتبة:

البيانات
التسجيل: Jan 2013
العضوية: 18
العمر: 20
المشاركات: 5,677 [+]
معدل التقييم: 117
نقاط التقييم: 53
بنت الحواء will become famous soon enough

الإتصالات
الحالة:
بنت الحواء غير متواجد حالياً
وسائل الإتصال:

كاتب الموضوع : عبد الله الدليمي المنتدى : منتدى اخبار العراق السياسية والامنية
افتراضي رد: د. طه الدليمي يسوي مشاكل.. وآني ابتلي!

بارك الله فيكم












توقيع : بنت الحواء

رد: د. طه الدليمي يسوي مشاكل.. وآني ابتلي!

عرض البوم صور بنت الحواء   رد مع اقتباس
إضافة رد

مواقع النشر (المفضلة)

د. طه الدليمي يسوي مشاكل.. وآني ابتلي!


أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع
مشاكل الرمادي بعد التحرير
من ترك الحق ابتلي بالباطل
مص الإصبع سبب مشاكل النطق عندالطفل !!
مص الإصبع سبب مشاكل النطق عند الطفل !!
علاج من ابتلي بالبعد عن الله


الساعة الآن 06:07 PM.


Powered by vBulletin® Version by Tar3Q
Copyright ©2000 - 2013, Jelsoft Enterprises Ltd
RSS RSS 2.0 XML MAP HTML